تحریر: ابو اشرف علی گڈاوی

دارالعلوم دیوبند ہمیشہ سے دینِ اسلام کا ایک مضبوط قلعہ اور عقائدِ اہلِ سنت والجماعت کا محافظ رہا ہے۔ چاہے فتنے اپنوں کی طرف سے اٹھیں یا غیروں کی جانب سے، دارالعلوم نے کبھی بھی مصلحت پسندی یا کمزوری کا مظاہرہ نہیں کیا، بلکہ ہر دور میں حق و باطل کے درمیان واضح لکیر کھینچ کر امت کی رہنمائی کی ہے۔

تبلیغی جماعت میں جاری اختلافات کے پس منظر میں بعض افراد دانستہ یا نادانستہ طور پر یہ تاثر دینے کی کوشش کر رہے ہیں کہ دارالعلوم دیوبند اور مولانا سعد کاندھلوی کے درمیان اب کوئی اختلاف باقی نہیں رہا۔ حالانکہ حقیقت اس کے برعکس ہے۔ دارالعلوم دیوبند نے متعدد مواقع پر واضح کیا ہے کہ مولانا سعد صاحب کے بعض بیانات اور نظریات علمی و اعتقادی طور پر اصلاح طلب ہیں، اور جب تک وہ ان پر نظرِ ثانی نہیں کرتے، دارالعلوم کا موقف تبدیل نہیں ہو سکتا۔

2016 میں دارالعلوم دیوبند نے ایک تحریری فتویٰ جاری کیا تھا، جس میں مولانا سعد کے بعض نظریات کو اہلِ سنت والجماعت کے متفقہ عقائد کے خلاف قرار دیا گیا تھا۔ 2018 میں مجلسِ شوریٰ نے ایک مرتبہ پھر اس موقف کو دہرایا کہ مولانا سعد کی بعض باتیں علمی و دینی طور پر قابلِ اصلاح ہیں، اور ان کی قیادت تبلیغی جماعت کے لیے نقصان دہ ہو سکتی ہے۔ اسی طرح، بنگلہ دیش کے عالمی تبلیغی اجتماع (2018) میں بھی دارالعلوم دیوبند کے اکابر علماء نے کھل کر کہا کہ جماعت کے اندر جاری انتشار اور نظریاتی انحرافات کو ختم کرنا ضروری ہے۔

یہ بات ذہن نشین رہے کہ دارالعلوم دیوبند اور دیگر دینی مدارس محض تعلیمی ادارے نہیں، بلکہ دین کے محافظ اور چوکیدار ہیں۔ جس طرح کسی ملک کے تحفظ کے لیے چوکیداروں کی ضرورت ہوتی ہے، اگر وہ اپنی ذمہ داری میں غفلت برتنے لگیں تو ملک خطرے میں پڑ جاتا ہے، اسی طرح یہ دینی ادارے دینِ اسلام کے لیے قلعے کی حیثیت رکھتے ہیں۔ اگر یہ دینی قلعے فتنوں کا تعاقب نہ کریں، تو دین میں طرح طرح کی گمراہیاں در آئیں گی، جو ملت کے شیرازے کو بکھیر کر رکھ دیں گی۔

دارالعلوم دیوبند کا مؤقف آج بھی واضح اور مستحکم ہے کہ جب تک مولانا سعد کاندھلوی اپنے ان بیانات سے رجوع نہیں کرتے، جن پر علمی و شرعی طور پر گرفت کی گئی ہے، تب تک ان کے حوالے سے دارالعلوم دیوبند کی پوزیشن میں کوئی تبدیلی نہیں آئے گی۔

یہی دارالعلوم دیوبند کی امتیازی شان ہے کہ وہ ہر فتنے کا تعاقب کرتا ہے، ہر دین دشمن نظریے کا پردہ چاک کرتا ہے، اور ہمیشہ حق کی ترجمانی کرتے ہوئے امت کی صحیح سمت میں رہنمائی کرتا ہے۔

https://whatsapp.com/channel/0029VatlDBpGE56kchkMZe34

-----------------------
اب آپ اسلامک گِیان کو واٹس ایپ پر بھی فالو کر سکتے ہیں، جہاں آپ کو روزانہ اسلامی مضامین اور حالات حاضرہ سے متعلق خبریں ملتی ہیں۔ ہمارے چینل کو فالو کرنے کے لیے نیچے دیے گئے لنک پر کلک کریں:

https://whatsapp.com/channel/0029VaT5KTW23n3arm5Fjr3H